Md. Axmed Siilaanyo oo xalay u waramayey telefishanka madaxabannaan ee SLCS, haddaba wargeyska Jamhuuriya ayaa si qoraal idinku soo gudbinay. waxa uu tilmaamay in diiwaangelintu ka mid tahay waxyaabaha fududaynaya in Somaliland aqoonsi ka hesho bulshada caalamka oo caddaynayso qaranimada, dawladnimada iyo madaxbannaanida Somaliland.
“Diiwaangelintu waxay caddaynaysaa qaranimadeena, dawladnimadeena iyo madaxbannaanideeda, waxaynu u halgamaynay oo aynu doonaynaa in aynu caalamka ka dhaadhicino in aynu nahay dawlad iyo dal madaxbannaan oo u qalma ictiraafka aynu caalamka ka raadinayno, taasina waxay ku imanaysa innaga oo ismuujina in aynu tiro iyo tayo leenahay oo aynu diyaar u nahay in aynu xoojino dimuqraadiyadeena iyo wasajirkeena,” ayuu yidhi Md. Axmed Siilaanyo.
Guddoomiyaha xisbiga KULMIYE waxa uu sharraxaad ka bixiyey ujeedadii laga lahaa weeraradii ismiidaaminta ahaa argagixisadu 29-kii bishii October la beegsatay saddex goobood oo muhiim ah oo ku yaala magaalada Hargeysa, isaga oo shacbigana u soo jeediyey inay ujeedadaas ka jawaabaan.
Isaga oo arrimahaa ka hadlayey wuxuu yidhi; “Waynu ognahay in duulaan la innagu soo qaaday, waxa la doonayey inuu innaga dumo dariiqa dimuqraadiyaddu, waxa la doonayey in nabadgelyadeenu inaga burburto oo doorashooyinka la innaga joojiyo.
Haddaba inaga dadweynaha reer Somaliland-now jawaabteenu maxay noqonaysaa? Waxay noqonaysaa in aynu intaas oo dhan beenino oo aynu muujino in aan doorashooyinkeenii isbedelin ee ay sidoodii u dhacayaan oo aynu diiwaangelintii diyaar u nahay shacbi, dawladda iyo xisbiyaba. Markaa maanta waxaynu joognaa xilligii aynu dagaalkaa wadageli lahayn oo aynu is muujin lahayn, sidaa daraadeed qof walowba meel kasta oo aad joogto waxaannu idinka codsanaynaa in aad xilweyn iska saarto si aad isku diiwaangeliso, waxay muujinaysaa xaqaagii iyo waajibkaagii qaranku kugu lahaa oo aad gudatay.”
Print mj. axmed siilaanyo oo jsl ugu baaqay in ay argagixisada kaga arrgutaan diiwaang 